Перейти к содержимому
Зи тIвар фу я,
Гьар инсандин рикI алай,
Захъ чилерин,
Захъ цаварин ни гала.
Зун вуч кас я,
Белки, адаз ашкар туш?
Ни дуьньядиз
ГъанатIа зун хабар туш?
ЯтIа гила яб гурай,
За куьрелди суьгьбетда,
Белки, ахпа Алиди
Заз рикIивай гьуьрметда.
Лежберди зун
Цанин хулаз гадарна,
Ахпа ада,
Яд гана, зун шадарна.
Къацу партал алукIна
ЭкъечIайла къецелди,
Ракъини заз хъипи ранг
Гана вичин гъилелди.
«Гуьдай вахт я!» —
Комбайнерди кIватIна зун,
Са арадлай
Регъуьн сиве гьатна зун.
Алидбурун тIанурди
Ифирна зи далуяр,
Таза дуьдгъвер элкъуьрна
Хъуьтуьлна зи хуруяр.
«Къачу, бала,-
Вугана зун Алидив, —
Къуй ви хъуьхъвер
Ухшар хьурай пIинидиз.
Фу тIуьна ви беденда
Шарвилидин гуж хьурай,
Амал хъсан акурла.
РикIизни вун хуш хьурай».
Гадарна зун
Алиди гъил кьулухъна,
Ам себеб яз
Зун къванерал алукьна.
Лагьана за: «Фан къадир
Авачирдаз иердиз,
Къадир авач чаз а фу
Къазанмишай лежбердин».
Алирза Саидов