Базардин юкъуз Керимани адан дидеди са вижевай къарпуз къачуна. Чакьракьардай тIарам къарпуз къужахда кьур Кериман руфун иердиз серин хьана. Диде гьикьван алахънатIани, Керима адав къарпуз вахканач. Вичи, гьакI къужахда кьуна тухуда, лагьана.
Ингье рекьин са пайни тахьанмаз, Кериман метIера зурзун, юкьвани тIал гьатна, къарпуздиз, вич-вичелай гъилерай акъатна, катиз кIанзавай хьиз тир. Дидедин гъиле авай ичIи чанта аквазвай Кериман кефияр мадни чIур жезвай. «Агь, за вуч карна?…Эхна кIанда».
Къарпуз калди, са уьтери яру тав гвайди хьана.
— Тухвана верчериз гадара! — буйругъ гана дидеди. — Им гьакIан шит яд я хьи.
Керимазни къарпуз гьахьтинди хьайиди акуна, амма адаз вичин зегьмет квадариз кIан хьанач.
— Пагь, чан диде, идалай ширин къарпуз заз гьеле акурди туш! — лагьана, ам иштагьдалди кал къарпуздин чанда гьахьна.
Гь. Межид
Гафар ва ибараяр: зегьмет — труд; вижевай — хороший; къарпуз — арбуз; тIарам — тугой, упругий; са уьтери — мельком, мимоходом; яру тав — красный оттенок; буйругъ гана — приказала; иштаьдалди — с аппетитом.
Суалар:
- Керима къарпуз гьикI хкана?
- Къарпуз гьихьтинди хьана?
- Кал къарпуз Керимаз вучиз гьайиф жезвай?