Гьикая. Четин кьуьд. Гь. Межид

     Чи классда Панагь лугьудай са гадани ава. Адан къиметар гьамиша пудар я. Амма яман мез авай гада я. Шумудра классда авай аялрихъ галаз хъелни хьана. Мадни вич гьа вич я хьи, я.

     ФатIиматаз вичин халуди ам хайи юкъуз къизилдин перо авай са авторучка пишкешна. Кьве йикъалай ФатIиматан ручка квахьна. Классдай квахьна. Панагьа мад вичин яргъи мез вири классра къекъуьрна. «Са еке къарпуз чуьнуьхайдавай и гъвечIи ручка къвалав гваз эхиз жедани?» — лугьуз, закай бегьем «чуьнуьх гумбатI» авуна. Зал гьамиша ихтибардай ФатIимат и гафунихъ инанмиш тушир, гьакI ятIани, гьамни шаклу хьана.

     Заз мад идалай такIан кар амачир. За вучин? И Панагь гьинай пайда хьанвайди тир? Зун бегьем тарсарни гьазур тежез кIеве гьатна. Эхир зи кIеве гьатун чир хьайи дидеди учителдиз, за къарпуз чуьнуьхайди туш, абур гьакIан ванер я, лагьана, малумарна.

    Зи дустари Панагьаз гьелягьар кьунай. Амма учителди чахъ галаз авур суьгьбетдилай гуьгъуьниз, чи ажугъар алатна ва гьа са гьафтеда ФатIиматан кефияр мад къумбар тир. Халудин ядигар гьат хъувунвай.

      Ручка чIехи стхади Магьачкъаладиз тухванвай кьван! Зунни михьи хьана, гила Панагьни. Ам, за лагьанай хьи, угъри ваъ, халис фитнечи тир. Гила классда садаз-сад такIанвал, гьуьрметсузвал амукьнач.

   Гьар вуч ятIани, и кьуьд зун патал гзаф четинди хьана. Вучиз лагьайтIа и кар зи рикIелай яргъалди алатзавачир.

Гь. Межид

Бегов Б. Б., Юзбеков А. Н., Тагиров А. А.

Лезги чIал: 3 синиф.- Магьачкъала,1995.-268 с.

Гафар ва ибараяр: къиметар – оценки; яман мез авай – злоречивый, злоязычный; къизилдин – золотой; пишкешун – дарить; квахьун – пропадать, исчезать; къекъуьрун – заставлять искать; чуьнуьхун – красть, воровать; къвалав – рядом, около; бегьем – довольно много; чуьнуьх гумбатI – вор; шаклу хьун – становится подозрительным, сомневаться; такIан кар – противное дело; малумарун – извещать, объявлять, обнаруживать; гьелягь кьун – грозиться, грозить; гуьгъуьниз – после, следом; кефи къумбар хьун – быть в хорошем настроение; ядигар – подарок; михьи хьун – очищаться; угъри – вор; халис – настоящий, подлинный; фитнечи – сплетник, клеветник; такIанвал – ненависть, недружелюбие; четин – трудный, сложный.

Суалар:

1. Панагьак гьихьтин хесет квай?
2. ФатIиматаз халуди вуч багъишнай?
3. ФатIиматан ручка квахьайла, Панагьа вуч лагьанай?
4. Панагьан гафари рушаз гьихьтин таъсир авуна?
5. Квахьай ручкадин месэла эхирни квелди куьтягь хьана?