Мусадин муьжуьд йис тир. Абур хуьруьн лап къерехда яшамиш жезвай. Абуруз гзаф верчер авай, амма гьар кьвед-пуд йикъалай верчерикай сад-кьвед квахьиз хьана. Мусадин диде-буба и кардал тажуб жезвай.
— Бес верчер гьиниз фирай? – вичи-вичик фикирна гадади. ХъуьтIуьн вахт тир, сафунай ичIирзавайди хьиз, куьлуь жив къвазвай. Югъ мичIи хьайила, Муса демекдин патав гвай тIанурда чуьнуьх хьана ацукьна. Вилер ахварихъ кузвайтIани, ам ксанач.
Йифен са арадилай чилел алкIиз-алкIиз са чакъал атана. Чакъалди, инсанди хьиз, вичин пацаралди демекдин ракIарихъ галай къван галудна, анай са верч кьуна. Мусадиз чакъалдин амалдарвал акуна, амма гада мадни амалдар хьана.
Ада и йифез гьич ванн-сес авунач. Чакъал верчни гзаф хъфена. Муса, тIанурдай экъечIна, кIвализ хтана. Бубани диде ксанвай. Мусани, явашдиз хтана, вичин чкадал ксана. Пакад юкъуз Мусади и чакъалдикай диде-бубадиз ихтилат авуна.
— Бес вуна чакъал вучиз кьунач? – лагьана бубади.
— АкI кьваз жедач, ам садлагьана, цIайлапан хьиз, катдай. Ам за къе йифиз гьикI кьадатIа, аку!
Мусади сикIер кьадай ракьар жагъурна, чакъал къведай гирведал экъяна. Муса вич архайиндиз кIвале ксана. Гьа икI са шумуд йиф алатна, эхирни чакъал ракьара гьатна.
Амалдар Мусади гьа икI чакъал кьуна.
Рамалданов А.Р. «Лезги чIал»
2-синиф,Махачкала, 2002,-332с
Гафар ва ибараяр: амалдар – хитрый, хитрец; диде-буба — родители; демек — курятник; тIанур — тандыр; чуьнуьх хьун – прятаться, укрываться; чакъал — шакал; пацаралди — ползком; ихтилат авун – беседовать, рассказывать; цIайлапан — молния; гирве — проход; архайиндиз – спокойно, беззаботно; йиф – ночь; кьун – ловить, поймать .
Суалар:
- Им мус хьайи кар я?
- Чакъалди верчер гьикI чуьнуьхзавай?
- Мусади зиянкар чакъал гьикI кьуна? Ихтилат ая!