Векьер-кьалар экъечIиз,
Гатфар йикъар атана.
Багъ-бустандив эгечIиз,
Эл ашкъидив ацIана.
Живер цIраз, бул ятар
Дагъларай къвез авахьна,
Гегьенш хьана чи вацIар,
КIамар-хулер акахьна.
Акъвазна тарар иер,
Къацу либас алукьна.
Мани лугьуз шад нуькIер
Къавун пипIел ацукьна.
Дагъни дере чи масан
ИкI гатфарив ацIанва.
Зегьмет чIугвар инсанри
Гуьзел йикъар атанва.
Д. Абдуллаев