Гатфар – руш я дамахар гвай!
Гатфар – свас я кІвалахар гвай!
Гатфар – кал я булахар гвай!
Гатфар – вирт я мумлахар квай!
Гад – гада я гьерекат квай!
Гад – къайда я берекат квай!
Гад – са вахт я мярекат гвай!
Гад – са бахт я лап къуват квай!
Зул – са вахт я къизил-гимиш!
Зул – са вахт я майва – емиш!
Зул – са вахт я марфар дуьзмиш!
Зул – са вахт я цифер къизмиш!
ХъуьтІуьн вахт я – живерин тахт!
ХъуьтІуьн вахт я – северин бахт!
ХъуьтІуьн вахт я – ял ядай вахт!
ХъуьтІуьн вахт я – живерин бахт!
Сажидин Саидгасанов
Гьуьрметлубур, за, са бязибуруз тарс хьурай лагьана, зарафатдин са гьикая рекье твазва. Бегенмиш хьайит1а, сайтдиз акъуда.
Сажидин
«ЗАЯЦ» лакIаб.
Кимел са кьадар инсанар кIватI хьанвай. Югъ рагъдандихъ агатунвай, кимин сергьят гегьенш жез башламишна. Советрин властдин эвел кьилера районда са гъвечIи къуллугъ жагъай Семеда, вич тажуб авур са кардикай ихтилат вегьена.
-Валлагь, гадаяр, за и ихтилат хъуьруьн патахъай ийизвайди туш. Жуван япаралди ван хьайи кардикай я. ЦIийи гьукумат тешкил хьайивалди, жавабдар къуллугъар, кар алакьдай, чпихъ са жуьредин кIел-кхьин авайбурал ихтибар ийизвай. Жагъайбурни хьана, амма кIандайвал виринра грамот авай пешекарар авачир. И ихтилат, чи райондин прикуротурадин къуллугъчийрикай садан отчетдай жагъанвай гафуникай я.
-Вуч аламат акунатIа, чазни лагь! — гьарайна кьарай такьур Гьажиди.
-Прокурордин следователдин патав, алатай гьафтед кьве йисан кьун квахьай ичинви атана, арза авуналда:
-Валлагь, чан чIехиди, хъуьтIуьз къах ийида лагьана, жува незвайдакайни атIуз, хуьзвай кьун авай. Са ахир пуч хьайи касди, цурин дакIардай атана, гьанал кьасабна, акъудна тухвана. Шак физвайбурни ава, амма бубайрин мисал авайди я: «Чуьнуьхайдаз – са гунагь, квахьайдаз, гагь идал, гагь масадал шак физва лугьу – цIуд гунагь ава»,- лагьана.
-Гила бес я махар ахъагъай кьван. Лагь, кьун шумуд йиса авайди тир?
-Кьвед, чан чIехиди.
-Кьун гьи рангунинди тир?
-Пеле къашкъа авай, яргъи крчар, чебни Сад-садал звер ганвай….
-За квевай ранг тир хабар кьурди!
-ЧIулавди тир, чан чIехиди.
Гьа и саягъда, лазим суалриз жавабар гайидалай гуьгъуьниз, следователди, кьун квахьай ичинви, «Ам чилин кIаник чуьнуьхнаватIани за жагъурда. Ахлад. Жагъайла, за ваз хабарда.-лагьана хуьруьз рахкурналдай
Гьар са къуллугъчидихъ, кьиле тухузвай кIвалах ахтармишиз, республикадай ара-бир векилар къведай адет я. Абурукай сад, кьисметдай хьиз, яргъал алай мукьвал авай са кас, чи кIвализ мугьман хьана. Хуьрек тIуьрдалай гуьгъуьниз ада ихьтин суьгьбет авуна:
-Я къадаш, Семед, зун накь прокуротурадин къуллугъчийри агьарийрин арзаяр кьабулзавай гьал ахтармишиз атанвай. Са документ акурла, зак хъуьруьн акатна. Кьун чуьнуьхай касдин арза кхьидай документда урус чIалал кьуназ лугьудай тIвар течиз, а кесибди, вири гафар, гъалатIар квайтIани, урус чIалал кхьенвай, амма кьун вири чкайрал – лезгидалди.
-Хва декьей пенкь лагь, кьуназни кваз вуч лугьудатIа течирда, колхозда кьванни вичелай алакьдай са кIвалах тавуна, прокуратурада вуч мерг авайди тир?
-Абур авам девирар тир,- лагьана, кIуфал квекведин хьиз, кIвенкI алай Межидаз, Зугьраба.-Ваз чидани кьуназ урус чIалалди вуч лугьудатIа?!
-Конечно! Кьуназ урус чIалал заяц лугьуда! Вазни завай чириз кIанзавай хьтинди я, кьей хва Зугьраб,- икI лагьана, кьве гъилив руфун кьуна хъуьрей Гьажида, кимеллайбур вири вичел хъуьрейла, — тахьайтIа тушни, -лгьуз амукьна?
-Я залумдин хва, «Заяц»! — рахана Семед. А касди вичиз чидай чIалал хьайитIани дуьз гаф кхьена. Жафа туширни, адан чкадал вун хьтин сам аса «Заяц» алайтIа? Кьунакай заяц ийидай.
Вири хъуьрена. И чIавалай башламишна, а кесиб рагьметдизни фена, адалай «Заяц» лакIаб алатнач.