Алимов Тагьир 1893-йисуз виликан Самур округдин, гилан Ахцегь райондин, Хуьруьгрин хуьре кесиб хизанда хана. Ам халкьдин арада ва литературада Хуьруьг Тагьир яз машгьур хьана.
Са кап фу къазанмишун патал гъвечIи Тагьира Нухада ва Бакуда девлетлуйриз нуькервал авуна. И йисара ада вичин дерди-гьалдикай сифте чIаларни теснифиз башламишна.
Хуьруьг Тагьираз хайи халкь, ватан, тIебиат гзаф кIандай, шаир абуруз рекьидалди вафалу тир. Адалай вичин ватандикай ихьтин гафар лугьуз алакьна: «Ви гуьрчегвал садахъни жеч, чан зи хайи диде ватан!». Шаирди хайи халкьдикай, ватандикай, халкьарин дуствиликай, тIебиатдикай цIудралди шиирар, шиирралди кхьенвай хкетар («Балашан зиянкар кац», «Жанавурдикайни чакъалдикай хкет» ва мсб.), поэмаяр («Хъуьлуьдрин ГЭС», «Малла Иса», «Гьавадин пагьливан» ва «ЧIулав къизил»), «Ашукь Саид» драма ва маса эсерар теснифна, абур кьилди ктабар ва кIватIалар яз чапдай акъудна.
Х. Тагьиран эсерар кIелзавайди гьавурда акьадай халкьдин девлетлу чIалал кхьенва. Абуруз къешенг рифмаяр, жуьреба-жуьре рангар ядай гафар, гекъигунар хас я. Шаирдин гзаф шиирар манийриз элкъвенва, абур артистри ва ашукьри лугьузва.
Хуьруьг Тагьир халкьдин рикI алай шаир я. Ам «Дагъустандин халкьдин шаир» тIварцIиз лайихлу хьана.
Шаир 1958-йисан 23-февралдиз кечмиш хьана. Ам Ахцегьа кучукнава. Шаирдиз хайи хуьре музей ачухнава.