Са сеферда лежберди векь язавай. Галатнаваз, ам са валан кIане ял ягъиз ацукьна. Садлагьана тамукай гишин жанавур хкатна.
Жанавурди, инсандин патав атана, фу тIалабна.
Адаз фу ширин хьана. Жанавурди лагьана:
— Заз гьар юкъуз фу нез кIандай. Амма ам за гьинай жагъуррай? Лагь ман.
— Чил цана кIанда…
— Ахпа фу жедани?
— Ваъ, я стха, акъваз. Гъар гана кIанда…
— Ахпа фу нез жедани? – тум галтадна жанавурди.
— Акъваз садра. Сифте техил цана кIанда. Ам акьалтда, гатфарихъ еке жеда, ахпа цуьк ийида, ахпа кьил вегьеда, ахпа дигмиш жеда…
— Агь, — ухьт аладарна жанавурди, — вуч яргъалди гуьзлемишна кIан жезвачни! Ваъ! И кIвалах гзаф залан ва сугъулди я. Вуна заз регьятдиз тIуьн гьикI жагъурдатIа, лагь…
— Хьуй манн, — лагьана лежберди. – ЯтIа. регьят тIуьн неъ. Яйлахда балкIан ава, гьаниз алад.
Жанавур фена яйлахдиз, адаз векь незвай балкIан акуна:
— БалкIан, балкIан, за вун неда.
— Неъ ман, — лагьана балкIанди. – Анжах сифте зи кIвачерик квай леэнер хкуда, тахьайтIа абуру ви сарар хада.
Жанавур рази хьана. Леэнар хкудун патал ам гьалтна, балкIанди адан сарар кутуна кIуру яна. Жанавур катна.
Гафар ва ибараяр: регьят – легкий; лежбер – крестьянин, косарь; садлагьана – вдруг; жанавур – волк; чил цун – землю вспахать; гъар гун — бороновать; техил цун – рожь посеять; дигмиш хьун — созревать; залан ва сугъул – тяжелый и скучный; яйлах – выгон, пастбище; леэнар — подковы.
Суалар:
- Жанавурдиз вуч кIан хьана?
- Фу гьикI жезвайди я?
- Жанавур лежберди лагьай меслятдал вучиз рази хьанач?
- Адаз регьят тIуьн гьатнани?