Тама ракъини нур гузвай. Гар тарарин хилерал, зулун манияр ягъиз, экIя жезвай. Хъипи пешер, цавай лув гуз, тарарин кIаник аватзавай.
Керекулди, мегъуьн тарцин кIукIни кукIва ацукьна, вичин жуьреда гьарай-эвер ийизвай. Ам садлагьана акъваз хьана. Адаз, далудал пар алаз, жигъирдай физвай кьуьгъуьр акуна.
— Вун ични кIулал алаз гьиниз физва, кьуьгъуьр стха? — гьарайна керекулди.
— Сифте салам гана, ахпа хабар кьадай затI я, — жаваб гана кьуьгъуьрди.
— Багъишламиша, кьуьгъуьр стха, салам за ваз къведай сеферда гуда.
— АкI хьайила, за ваз жавабни гьа чIавуз гуда.
— Са гъвечIи акъваз, за ваз цIийи хабарар ахъайда.
— Заз мажал авач, лагъ гьерекатна, куьрелди.
Рахана керекул, рахана керекул, вичиз акур-такур, ван хьайи-тахьай — вири хабарар ахъайна, рикIин сирер ачухна.
— Бесрай ви лагълагъар, заз геж жезва, зун хъфида, — лагьана кьуьгъуьрди.
— Са гъвечIи хьайитIани акъваз хъия, дуст кас! За ваз вири хабарар ахъайна, рикIин сирер лагьана. Амма вун, сиве яд кьурди хьиз, кисна акъвазнава. Гила хьайитIани вуна заз жуван сирер ачуха!
— Вавай ви рикIин сир хуьз тежезвайди, зи рикIин сир хуьз жедаии? За ваз лугьудай гьич са гафни авач, лагълагъчи, — лагьана, кьуьгъуьрди вичин рехъ давамарна.
И. Агьмедов
Гафар ва ибараяр: керекул — сорока; кьуьгъуьр — ёж; кIукIни кукIва — на самой вершине, макушке; жигъирдай — по тропинке; мажал авач — некогда, нет свободного времени; куьрелди — кратко, вкратце; акур-такур — виданное-невиданное; рикIин сирер — сердечные тайны; кьур — сухость, сухота; кисна — молча, втихомолку; лагълагъчи — болтун, балаболка; рехъ — дорога, путь; давамарун — продолжать.
Суалар:
- Керекул гьина ацукьнавай?
- Адаз вуш акуна?
- Аданни кьуьгъуьрди арада гьихьтин ихтилат хьана?