Заз Уьлмез лугьудай са кицI авай. Са сеферда зун Уьлмезни галаз гъуьрчяй хквезвай. Няниз мукьва тир. Экв аламаз хуьруьз ахгакьун патал зун, рехъ туна, мукьвал жигъирдай фена.
Бирдан зун татабар хьана алукьна. ГьикI ятIани зи валчагъ раган хъиткьердай экъечIнавай тарцин хилехъ галкIана. Зун раган къерехдилай куьрс хьана. Агъадай вацIун ван къвезвай.
Зун гзаф хаталувилик акатна, кьадай затI жагъизвачир, живеди кьунвай къванерилай зи гъилер цIуьдгъуьнзавай. Гьа и вахтунда Уьлмеза заз куьмек гана. Ада зи валчагъдин хел сарарив кьуна, кьулухъ кIвачер чиле акIурна, чIугваз башламишна. Ада мукъаятдиз, нубатдалди кIвачер дегишариз, зун чIугвазвай. Эхирни завай раган къерех кьваз хьана. Вилик гуж гана, зун хурухъди раган къерехдал ярх хьана. Уьлмеза зи валчагъдин хел гьеле ахъайзавачир ва вичини къариба жуьреда цIугъ ийизвай.
Заз, гьикьван вахтунда зун ярх хьана амукьнатIа, чидач, амма фад мичIи хьана. Яргъалай хьиз агъадихъай хуьре эквер куькIвена. Уьлмеза зун рекьел ахкъудна. Ахпа зун саламатдиз хуьруьз хтана.
А. Ражабов
Рамалданов А.Р. «Лезги чIал»
2-синиф,Махачкала, 2002,-332с
Гафар: гъуьрч — охота; жигъир — тропа; татабар хьун — оступится, потерять равновесие; валчагъ — бешмет, кафтан; хаталувилик — в опасности; цIуьдгъуьнун — скользить; чIугун — тащить; мукъаятдиз — осторожно; нубатдалди — поочерёдно; ярх хьун — свалится, упасть; цIугъ авун — выть, визжать; саламатдиз — благополучно.
Суалар:
- Гъуьрчехъандин кьилел вуч дуьшуьш атана?
- КицIи ам гьикI къутармишна? Ихтилат ая.