Шиирар — мискIалар. Шаир Имам Асланов. Загадки в стихах на лезгинском языке

Яб це куьне, аялар!
Гуда за квез мискIалар.
Ни фадамаз лагьайтIа,
Дуьз жавабар жагъайтIа,
Ам кар чидай аял я,
Чи къугъунин кьегьал я.
Мукьув хьухь куьн, аялар,
КIватIин чна хиялар.
Къуй хьурай чаз азабар,
Аквадайвал жавабар.          
                           1.
Яргъи гардан, гъвечIи кьил —
Жирафдиз вич ухшар я.
Ам гьайван хьиз жемир квез —
Беден вири ракьар я.
Буйдикайни рахайтIа,
КIвалерилай кьакьан я.
Хкаждайбур гьамиша
Гзаф залан затIар я.
Вуч я ихьтин заланди —
Икьван еке, кьакьанди?
                         2.
Луварни квач — ничхир туш,
Вич я зурба «ракьун къуш».
Чалагъан хьиз, гьавада
Са чкадал къугъвада.
Къачуда пар — тухуда —
Яцни балкIан герек туш.
Им вуч хьурай ихьтинди
Цавай фидай къачуз пар?
Низ чидатIа, хкаж гъил —
Лагь вуч ятIа, адан тIвар!
                       3.
Гуьзгуьдай хьиз инсанар
Адан къеняй аквада,
Гагь са итим, гагь са руш
Ваз килигиз рахада.
Тамашаяр ва кьуьлер…
Тух жедач вун тамашиз,
Галатдалди ви вилер.
Гагь гужлуз, гагь явашдиз
Зуьрнедин ван къведа ваз,
Гагь далдамдал илигна,
КIвалин къене ацукьна,
Кинодиз вун килигна.
Гъил хкажа чидайда,
Лагь кван ам вуч затI ятIа!
                         4.
Я гуьлле туш, я гар туш,
Гьакъикъат я — ахвар туш.
Гуьлле хьиз вич фидайди,
Кьулухъ ялав тадайди,
Вичин рекье гьатайла,
Дуьньядихъ гелкъведайди.
Ихьтинди вуч хьурай, пагь!
Низ чидатIа, къарагъ, лагь!
                        5.
Чарх я йигин элкъвезвай,
Аяларни хъуьрезва.
Аламатар жеда кьван:
Гуьгъуьналлаз сад-садан
Жанавурар, балкIанар,
Миргер, къуьрер, асланар
Физва вилик, тийиз сес,
Ам вуч ятIа, лагь тIун бес?
                         6.
Къуватлу жунгавди хьиз,
Кьил экъуьрда чилера,
Жунгавди хьиз яд хъвадач,
Векьни недач чуьллера.
Накьваркай кIунтIар ийиз,
КIунтIарни патар ийиз,
Фида кьулухъ, гагь вилик,
Тади квачиз гьич вичик.
Хкажа гъил, лагь акван,
Низ чидатIа, тIвар адан!
                       7.
Сарар ава сив квачиз,
Гьамиша вич хъуьреда,
Кутунмазди ток вичик —
Ам йигиндиз элкъведа.
«ТIуьн» ганмазди, гьасятда
Ван акъатда сарарай,
Ашкъи аваз гьужумда
Тахтайрални гъварарал.
                          8.
Гьамишанда инсандин
Майил жеда бахтунихъ,
Амма са затI датIана
Къекъвез жеда вахтунихъ.
Гъил хкажа чидайда,
Лагь кван ам вуч затI ятIа?
                        9.
Гуда за квез мискIал мад,
Низ чидатIа, лагь кван фад!
Къене аваз инсанар —
Гьуьлуьн кIаняй фидайди,
Ватан хуьнин къуллугъда
Вич лап герек жедайди.

Имам Асланов

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.