Лацу яргъан алукIна чуьл
Ийиз жеда ахвар, кьуьд.
Авуна на михьиз сефил,
ВиринуькIвер, къушар, кьуьд.
Чуьллер жеда пара пелеш,
Амачиз векь — кьалар, кьуьд,
Вилиз такваз къацу тир пеш,
Чуплах хьана тарар, кьуьд.
Мажбурда на ийиз кIевер
Михьиз ракIар, дакIар, кьуьд.
МетIяй ягъиз жеда живер,
Вун алукьай йикъар, кьуьд.
Серф гьатайла а ви гъиле,
На къалуда гьунар, кьуьд.
МуркIад кьуна дере- тепе,
Михьиз гьуьлер, вацIар, кьуьд.
СтIал шаир Мусайибаз
Вакай хьана хабар, кьуьд.
Ви гьайбатар акурла заз
Лагьана и чIалар, кьуьд.
Гьуьрметлу аялар, чун гъвеч1и ч1авуз, гатфарин марф къвадайла, кьилерал ва к1вачерални алачиз, » чан марф» лугьуз, хъуьрез куьчеяр тирвал чамарар ийиз, къугъвадай. Аял ч1аварилай т1ебиатдал ашукь тир заз жув гилани аял хьиз ама. Т1ебиатдал ашукь касдин руьгьни жегьил яз амукьда.
Сажидин
КВЕЗ ХВАШГЕЛДИ
Ван ацалтна къвада марфар,
Цуькверикай ийиз гьарфар.
Ваз хвашгелди, я чан гатфар,
Къацу либас гваз атанвай!
Худда туна ракъинин чад,
Берекатрин гьатнава ад.
Ваз хвашгелди, я мугьман гад,
Теспачавал кваз атанвай!
Салан майва, емишар бул,
Мелни мехъер, чими тир къул,
Ваз хвашгелди, я дарман зул,
Цавай марфар къваз атанвай!
Мекьивили кутаз хъиткъитІ,
Живер пара, рагъ хьана кьит.
Ваз хвашгелди, я яман кьуьд,
Чил муркІадив кьаз атанвай!
Кьуьдни гатфар вахи вахар,
Гадни зул я бажанахар,
Сажидинан квахьна ахвар,
РикІе шадвал тваз атанвай!