Сифте гатфар алукьай варз,
Чил рехи жез аквада ваз.
Дагъдай лацу живер цIраз,
Авахьда ятар гатфариз.
***
ЧIулав цифер тунгъал-тунгъал
КIватI жез кьакьан дагъдин кукIвал,
Цавар рахаз мукьвал-мукьвал,
Къвада бул марфар гатфариз.
***
Къачу михьи гьавадкай дад,
Пакамахъ вун къарагъа фад.
Вири инсанар жеда шад,
Ийиз дамахар гатфариз.
***
МетIяй физ векь хьана битмиш,
КIвач эцигиз къведач къимиш,
Цуькверивди жеда дуьзмиш
Гегьенш яйлахар гатфариз.
А. МутIалибов