Дагъустандин халкьдин шаир Шагь-Эмир Мурадов (Шах-Эмир Мурадов) 1913-йисуз Ахцегь райондин Къурушрин хуьре дидедиз хьана. ТIебиатдал рикI алаз чIехи жезвай гадади мектебда лап хъсан къиметар аваз кIелни ийизвай. Ада вичин гьиссерикай шиирарни кхьизвай. Сифте эсерар 1933-йисуз райондин «ЦIийи дуьнья» газетдин чинриз акъатна.
Дагъустандин СтIал Сулейманан тIварунихъ галай педагоический институтдин физикадинни математикадин факультет куьтягьна, Ш.-Э. Мурадова Ахцегь райондин хуьрера школайра муаллимвал авуна. Ахпа «Социализмдин пайдах» ва «Коммунист» газетрин редакцийра, Дагъустандин радиода ва «Дуствал» альманахдин редакторвиле кIвалахна. 1949-йисуз шаирдин сад лагьай ктаб акъатна. Адан тIвар «Хушбахт Дагъустан» тир.
Ш.-Э. Мурадов «Дагълара эквер», «Маргъухъанар», «Демир ва Селми» ва маса поэмайрин автор я. Адан шиирар, манияр, балладаяр ва гъезелар ихьтин кIватIалар яз акъатнава: «Лацу лифер», «Рахазва Шагь дагь», «Шалбуз дагъдин шагьвар», «Багьа декьикьаяр» ва мсб.
Шаирди гзаф эсерар аялар патал теснифнава. «Нин савкьват хъсанди я?», «ВикIегь Камал», «Аламатдин шикил» кIватIалар аялриз бахшнавай шииррикай ибарат хьанва. Ш.-Э. Мурадова драмадин эсерарни кхьена. Адани А. Ражабова теснифнавай «Фундугъбег» тамаша Лезги театрдин сегьнедилай къалурзава. Шаирди лезги чIалаз А. Пушкинан, М. Лермонтован, Н. Некрасован, В. Маяковскийдин, Р. Гьамзатован ва маса тIварван авай зарийрин эсерар таржума авунва.
Шаир 1996=йисуз Магьачкъалада кечмиш хьана.