Забит Ризванов 1926-йисуз Азербайжан Республикадин КцIар райондин Манкъулидхуьре лежбердин хизанда дидедиз хьана. Ада хуьруьн юкьван мектеб, Бакудин высший партийдин мектеб куьтягьна. Гзаф йисара муаллимвиле, колхоздин председателвиле ва маса жавабдар къуллугърал кIвалахна.
Забит Ризванов шаир, писатель-прозаик, драматург я. Литературадин эсерар кхьинал ам гьеле мектебда амаз машгъул хьана, амма абур печатдиз акъудун гьамиша лап четин кар яз амукьна. Гьавиляй адан сад лагьай ктаб, «Рамизан дустар», 1959-йисуз Магьачкъалада чапдай акъатна.
З. Ризванов вишералди манийринни шииррин, цIудралди гьикаяйринни повестрин, драмайринни романрин ва маса эсеррин автор я. Магьачкъалада, Бакуда ва Масквада чапдай акъатнавай «Шагьнабатдин сел», «Гар чуьлда жеда», «Пайгьамбардин къацу пайдах», «Ильгьамдин пери» ва маса ктабар инсанри рикI алаз кIелзава.
Забит Ризванов чи халкьдин мецин яратмишунар, «Шарвили» эпос ва тарихдиз талукь делилар кIватI хъувунал машгъул тир. Нетижада «Шарвили» эпос арадал хтана ва «Лезгийрин тарих» ктаб печатдай акъатна. Адан къелемдикай литературадин, чIалан, культурадин ва къанажагъдин месэлайриз талукь ялавлу макъалаяр ва веревирдар хкатна.
Забит Ризванов 1992-йисан 22-ноябрдиз яргъалди чIугур залан азардик кечмиш хьана. Ам вичин хайи ватанда кучукнава. Ватанперес ва инсанперес шаирдин тIвар Манкъулидхуьруьн юкьван мектебдал эцигнава.
Забит Ризванова вичин «Весида» литературадикай ва тарихдикай ихьтин гафар кхьена: «Тарихни эдебият стхаяр я, сада лагь лугьуда, муькуьда лугьуда. Тарихди чирда, эдебиятди чирвилер виридаз пайда… Тарих гуьзгуь я, адаз мукьвал-мукьвал килиг… Вичин тарих якъин ва дериндай чир тахьанмаз, лезги халкьдивай дуьньядин халкьарин жергейра барабар чка кьаз жедач».