Лезгийрин бажарагълу шаир Алирза Саидов 1932-йисан 15-январдиз Ахцегь райондин Хъутунхърин хуьре дидедиз хьана. Гьеле школада кIелзавай йисара ада шиирар кхьиз башламишна.
Алирза Саидован шиирар 1949-йисалай «ЦIийи дуьнья» ва «Социализмдин пайдах» газетрин чинриз акъатиз башламишна.
А. Саидова Ахцегьрин сад лагьай нумрадин юкьван школа куьтягьна, Советрин Армиядин жергейра къуллугъна. Москвада М. Горькийдин тIварунихъ галай Литературадин институтда кIелна. Ада «Социализмдин пайдах» ва «Коммунист» газетрин, «Дагъустандин дишегьли» журналдин редакцийра, Дагъустандин писателрин Союзда кIвалахна.
1959-йисуз Дагъустандин ктабрин издательстводи жегьил шаирдин сад лагьай ктаб («Самурдин авазар») акъудна. Гьа и йисуз Москвада урус чIалалди «Вахъ галаз, Самур» тIвар алай ктабни печатдай акъатна.
А. Саидов вишералди гуьзел шииррин, цIудралди манийринни балладайрин, сонетринни гъезелрин, риваятринни поэмайрин ва манийрин автор я. Абурукай «Зи экуь гъед», «Гимишдин симер», «Уста Идрис», «Хцихъ галаз суьгьбет», «Дуствилин муькъвер» ва маса кIватIалар ибарат хьанва.
А. Саидова аялар патални гзаф эсерар теснифнава, абур кьилди кIватIалар яз печатдай акъатнава.
Алирза Саидован эсерар Дагъустандин ва виликан Советрин Союздин халкьарин, ва къецепатан уьлквейрин чIалариз (ингилис, болгар, поляк ва мсб.) таржума авунва.
А. Саидова лезги чIалаз А. Пушкинан, М. Лермонтован, М. Горькийдин, Т. Шевченкодин, М. Маяковскийдин, С. Есенинан, А. Твардовскийдин, Р. Гьамзатован ва маса шаиррин эсерар таржума авуна.
Алирза Саидован чIалар бинеда эцигна, лезги композиторри манияр теснифнава. Месела: Гь. Мурсалован «Маяк Саимат», А. Мегьманан «Африка» ва мсб.
А. Саидов Дагъустан республикадин СтIал Сулейманан тIварунихъ галай премиядин лауреат я. Адаз и гьуьрметдин тIвар вич кьейидалай кьулухъ гана.
Алирза Саидов 1978-йисан мартдиз яргъал чIугур азардик вахтсуз кечмиш хьана. Магьачкъалада кучукнава.