2-классда грамматикадай кIелайбур тикрарун

1-тапшуругъ. КIела, ачух сесер къалурзавай гьарфар гьибур ятIа, лагь.

Керим дагъдин хуьре са авам итим тир. Адан гада Мирзеди шегьерда кIелзавай. Керима кIелайди тушир, ам, амай хуьруьнбур хьиз, вичин цан цаз, мал хуьз, зегьмет чIугваз дуланмиш жезвай.

2-тапшуругъ. Агъадихъ галай гафар алфавитдин къайдада кхьихь.

Элжекар, мяден, Ямудин, къизилгуьл, басма, итим,паб, дишегьли, руш, гада, уьрдег, етим, ЦIарак, тIур, савда. 

3-тапшуругъ. Агъадихъ ганвай гьар са гафуна шумуд слог аватIа, лагь.

Куь мурадрин рекье ава, диде зун.
Ватан азад, уьмуьр шад яз авазва.
Ви лайлайдин ширин сес зи япара
Хайи чилин генг чуьллерай акьазва.

4-тапшуругъ. Са-са слог, ван акъудна, кIIела.

Фаз юкь а-гъу-за гьар чIа-вуз куь-не,
Фу я ин-сан-дин къу-ват-ни и-ман.
Куь-луь кIус-ни яхъ чан-ди-лай ви-не,
Фу я гьар са-дан дер-ди-нин дар-ман.

5-тапшуругъ. Гафар, слогриз пайиз, кхьихь.

ЧIехивал, мубарак, курквачI, дуствал, къуршахар, лопатка, намуслувал, кIвенкIвечи, хважамжам, къавурма, калер, чарар.

6-тапшуругъ. Агъадихъ ганвай гафар сифте авайвал, ахпа кьулухъай вилик кIела.

Кицик, аба, кьиникь, тIунутI, такьат, Тават, шириш, кесек, кьукь, пIипI, хуьнуьх, шиш, кек, финиф.

7-тапшуругъ. Агъадихъ ганвай гафар екьатI цIийи цIарцIиз акъуддай тегьерда, слогриз чара авуна, кхьихь.

Аквадай, регъвер, лекъвер, кьуькер, цуьквер, жакьвазва, руквар, тIеквен, уьлкве, буьркьвеба.

8-тапшуругъ. Гафар кIела. Слогрин чкаяр дегишара. Арадал атай гафар кваз 2-3 жуьмле туькIуьра.

Маса, Неби, дана, базар, Гьемзе, гьима, фейи, гайи, рекье, кIири.

9-тапшуругъ. Суалриз тамам жавабар це.

1. Ачух сесер гьихьтин сесериз лугьуда?
2. Лезги чIала шумуд ачух сес ава?
3. Ачух тушир сесер гьихьтин сесериз лугьуда?
4. Чи чIала ачух тушир сесер шумуд ава?
5. Гафуна шумуд слог жеда?
6. Сесер кхьинра квелди къалурда?
7. Лабиал сес квай гафунин кьатI муькуь цIарцIиз гьикI акъудда?

10-тапшуругъ. Шиир хуралай чира, ахпа, ктаб, акьална, кхьихь.

Гьар са касдал вичел къимет
Вичин михьи рикIи тада.
Къачур касдин михьи зегьмет
Кьилел элди хунча кьада.
                                 (Огъланбике Даштиева)

     Если у кого-то возникнут вопросы по данному уроку или пожелания, пишите в комментарии или на e-mail lezgikids@ya.ru