Тама авай кIанчİунихъ са сикI агалтнавай. Каш ацалтнавай адахъ кIвачел акъваздай аман кумачир. Вилерикай верчер, къуьрер карагиз, кьарай квахьнавай адан.
Са герендилай сикl къарагъна недай затlарихъ гелкъвена. Югъ няни жез-тежез ам тамун агъа кьилиз акъатна. Инай хуьр аквазвай. Гьава мичIи хьунивай, дакlарра эквер куькlуьнзавай. Са демекдиз гьахьун тир сикlрен мурад. Виридалайни мукьвал кlвал галайнихъ чукурна ада.
Демекдай къвезвай верчерин ванер адан япарихъ верцlи макьамар хьиз галукьзавай. Жугъунив агакьайла ада инихъ-анихъ килигна, гьаятдиз хкадарна.
Демекдилай элкъвез, къенез гьахьдай тIеквен жагъурзавай сикIре. Ингье демекдин кьуд пад кIеви яз акур ада цлан кIаникай хьиз ламу накьв тапацрив чална, тlеквен акъудна. Къенез гьахьай ничхирдин хвешивилин и кьил-а кьил авачир. Чанда кичl гьатай верчерин къакърадин ванер акъатайла сикlре тадиз абурал вегьена.
Япарихъ ванер галукьай кlвалин иеси гьасятда цлахъай куьрснавай тфенгни кьуна къецел экъечIна. Верчерин цIакулар акур кас чуьнуьхгумбатI гьахьай тlеквендихъ гелкъвена. Ингье вич гьахьай чка накьвадив кlевирна катай сикIрен гелни амачир.
Гъуьрч тIуьна чандиз ахвайш хьанвай сикlрен рикIе муькуь юкъузни демек акьуна. Ам накьанан хьиз демекдиз гьахьна, са верч тlуьна, и гъилерани арадай акъатна.
Гьа икI, кткана сикl демекдик. Гьавалат хьана ам верчерал. Сад нез, кьвед саралай ийиз, кефер хкудзавай ада.
Садра кlвалин иесидин хурукай са гужалди хкатна гьалдай фенвай сикI жанавурдал гьалтна. Ам усалдиз акур жанавурди жузуна:
— Вагь, я сикl, вун гатанва тахьуй?!
— Сикl гатадайди дуьньядал атанвач.
— Ви кьил-кlвач цlапурар я хьи.
Жанавурдикай хъел авай сикIре адалай кьисас къачун кьетI авуна.
— Масад тиртlа лугьучир за. Ингье ви хатур заз гзаф кlан я. Заз кьилелай алахдай кьван тlуьн авай са чка жа-гъанва.
Хвешила жанавурдин вилери рапрапарна:
— Къалура кван а чка. Гишила рекьизва зун.
Сикlре жанавур хуьр галайнихъ тухвана. Рехъ тирвал ада верчерин тарифар ийиз, жанавурдин иштагь артухарзавай. Абур демекдив агакьна. Сикlре вичи акъудай тIеквендин винеллай накьв чална, жанавурдиз лагьана:
— Гьахьа къенез!
Жанавурди сикlрез вилер экъисна:
— Вун кими хьанвани? Зун ана гьатдач.
— Кичlе жемир, за ваз рум гуда, — лагьана сикIре.
Эхирни адан куьмекдалди гьахьна жанавур къенез. Верчер акур адан кефи къумбар хьана.
Са герендилай сикlре лагьана:
— Я кьей хва, вахт квадармир. Кьуд-вад верч зав гице. Са гьафте недай ризкьи хьурай чаз.
Жанавурди ада лагьайвал авуна. Верчер гъиле гьатайдалай кьулухъ сикlре лагьана:
— Мад бес я. Гила жуван руфун ацlура.
Жанавур гьалтна верчерин чандал. Сад тlуьна, кьвед тlуьна, пуд тlуьна. Руфун ацlанвайтlани, вил ацlузвачир адан.
Верчерин ванери ахварай авудай кlвалин иеси тфенг кьуна демек галайнихъ зверна. Яргъалай хьиз ам акур сикl валарин арада чуьнуьх хьана. Адаз жанавурдин кьилел гьихьтин иза-къаза къведатIа вилералди акваз кlанзавай.
Жанавурдиз демекдай акъатиз кlан хьана. Ингье руфуник ял акатнавай ничхирдивай анай акъатиз хьанач. Ада кичlела цlугъна:
— Я кьей сикl, за вуч ийин? Акъатиз жезвач завай инай! Куьмек це заз!
— За ваз са вечрелай пара немир лагьаначирни?
— Ваъ, вуна заз «руфун ацlура» ла-гьанай.
— Вахъ жуван кьил авачни? Руфун жувалай агъуз я эхир!
И чIавуз тфенгдай акъатай гуьлледи чуьнуьхгумбатIдин чан къачуна. Ничхир кьена акур касдин рикl чкадал хтана. Сикl лагьайтlа, валара чуьнуьхарнавай верчер сара кьуна, тамуз катна.