Къурбанд ая са хебни мал,
РикIел гъана Женнетдин гьал,
Эхиратда тахьурай къал,
Квез Къурбандар мубаракрай!
Им Дуьнья я са вад йикъан,
Къурбанд ая эхират къан,
Къулгьу, Важжагьт кIелиз жуван,
Квез Къурбандар мубаракрай!
Ирид кIвализ це берекат,
Аллагьди квез гурай такьат,
Пайгъамбарди квез тур савкьат,
Квез Къурбандар мубаракрай!
Салам-калам гъана мецел,
Къе факъирар тамир къацел,
ЧIехи Аллагь алаз кьилел,
Квез Къурбандар мубаракрай!
Къуръандавай гьар са аят,
Гьар са касдиз михьи ният,
Къурбанддалай гъиз салават,
Квез Къурбандар мубаракрай!
Куь Къурбандар сувабар хьуй,
Квез Аллагьди берекат гуй,
Квел дуьшуьшни-бала татуй,
Квез Къурбандар мубаракрай!
Сад Аллагьдин Вичин кьадар,
Экуь Дуьнья тахьуй квез дар,
Вилик фена куь гьар са кар,
Квез Къурбандар мубаракрай!
Исламдивай жемир къерех,
Пайгъамбардиз акъатай гьекь,
Ислам диндин кIевиз яхъ рехъ,
Квез Къурбандар мубаракрай!
Сираждинан салам я квез,
Кьегьал хваяр кIвачел къекъвез,
Вахт атайла Къурбандар жез,
Квез Къурбандар мубаракрай!