Гьуьрметлу аялар! Квекай гзафбуруз, заз чиз, Рамазандин вацра сив хуьникай ван атана ва я куь дидебубайри сив хуьдайла акуна. Чи ихтилат къе гьа Рамазандин вацракай фида.
АллагьТаалади, Рамазандин варз алукьайла, чи хиве ферз тир сивер кьун тунва. Гьар са мусурман и варз алукьунал шад жезва. Абуру сада-садаз и варз алукьун тебрикзава, и вацра анжах хъсан крар ийиз чалишмиш жезва. Аллагьдивайни чна чаз и карда куьмек гун тIалабзава. И хийирлу вацра АллагьТаала иллаки чун патал регьимлу жезва, Ада сивер хвенвай касдин гунагьрилай гъил къачузва. Аллагь виридалайни Жумартлуди я, Ада эгер чна авур вири чIуру крарал рикIин сидкьидай пашман хьайитIа абурулай Ада гъил къачуда. Куьн патал заз са шад хабар ава. ГъвечIи аялривайни чIехибурухъ галаз санал сив кьаз жеда. Балаяр, и йисуз сивер хуьз жедатIа аку! Са шумуд юкъуз хьайитIани. Куь беденар гьеле гъвечIи я, куь гъвечIи жендекар гьеле кIеви хьанвач. Гьаниз килигна аялар пара ксана кIанда ва абуру хъсан тIуьна кIанда. Аллагьди аялриз тIимил йикъара сив хуьдай ихтияр ганва. Куьн чIехи хьайила, иншаллагь, куьнени са вацран къене, чIехибуру хьиз, сив хуьз башламишда. Араб чIала сив хуьниз «Савм» лугьуда.
Квез сив гьикI хвена кIанзаватIа чизвани?
Рамазандин вацра къецел экв амай кьван чна тIуьна ва я хъвана кIанзавач. Экуьнахъ, яр хьанамаздини, вири сив хуьзвайбуру тIуьн-хъун акъвазарзава. ГьакI рагъ акIидалди. Няниз, хурушум жедайла, къецел экъечIна ракъиниз килиг. Яргъай квез рагъ ацукьзаваз ва ам горизонтдик акатзаваз аквада. Гьа идаз рагъ акIун лугьуда. Гьа идалай гуьгъуниз сив кьадай вахт кутягь жезва. Мусурманри сив хкудиз гьерекатзава. Сив, адет яз, хурмайривди са шумуд хупI яд хъвана хкудзава.
Сив хуьн чаз вуч патал герек къвезва?
Сад лагьайди, сив хуьн чна кьилиз акъудна кIанзавай Аллагьдин эмиррикай сад я.
Кьвед лагьайди, инсанри чпиз и кардай хийирлу тарс хкудзава. Абуруз чаз Аллагьди гузвай няметрин къадир чир жезва. Сив хуьзвай вахтунда чи рикIера АллагьТааладиз шукур гъунин гьиссер ачух жезва. Месела, сив кьадайла чаз гишин жезва ва тIуьнин тIям, тухзавай вахтунихъ галаз гекъигайла, хъсан чир жезва. Чаз гьи тIуьн хьайитIани тIямлу жезва. Чаз тIямрин ва нийрин жуьрба-жуьрбавал ганвай АллагьТааладиз шукур хьуй!
Рамазандин вацра сив хуьникай мад са хийир ава. И вацра хейлин вахт чна фу тIуьн тавуна акъудзава. И карди инсандиз тIуьникай фикир тийидай, жуван фикир ибадатдиз, хъсан крариз гудай мумкинвал гузва. Идалайни гъейри сив хуьзвай касдиз фу къачудай такьат авачиз гишила авай касдин дердиникай хабар жезва.
Гьуьрметлу аялар! Куьне незвай шей тармар ийимир. Адаз куьне къимет гана кIанда. Незвай хуьрек эхирдал
кьван неъ. Ша чна Аллагьдиз шукур ийин ва «АльгьамдулилЛагь» лугьун.