Деведиз къумлухдин гими лугьуда. МетIерихъ кьван кIвачер аватдай къумадай ам, дуьз рекьяй хьиз, фида: адан тапасар хъуьтуьл ва гьяркьуьбур я.
Деведиз яргъи ва къуватлу кIвачер, яргъи гардан, куьруь япар, еке вилер ава.
Ам я тIуьн, я яд авачиз тамам са гьафтеда яшамиш жеда. Адавай санал са шумуд ведре яд хъваз жеда. Ахпа ацукьна ял яна, мад са ведре яд хъун хъувуна, ада рехъ давамарда.
Деведивай регьятдиз чимивални, къайни эхиз жеда. Ада акатай гьи векь хьайитIани, гьатта цацарни неда.
Деведивай залан парар тухуз жеда.
Девеяр са мандав ва кьве мандав авайбур жеда.
Девейрилай инсанри хъсан хъуьтуьл сар твада. Адакай шарфар, гуьлуьтар, перемар, бегьлеяр храда. Деведин некIедикай чIем ва ниси хкудда.
Рамалданов А.Р. «Лезги чIал»
2-синиф,Махачкала, 2002,-332с.
Гафар ва ибараяр: къумлухдин гими — пустынный корабль; тапасар — лапы; хъуьтуьл — мягкий; гьяркьуь — широкий; гьафтеда — в неделю; ял ягъун — отдыхать; цацар — колючки; парар — грузы; мандав — горб; гуьлуьтар — носки; перемар — одежда; бегьлеяр — перчатки; чIем — масло; ниси — сыр.
Суалар:
- Деве гьина яшамиш жезва?
- Ам гьихьтин гьайван я?
- Ада вуч незва?
- Адакай инсанриз гьихьтин менфят ава?