Гатфар – руш я дамахар гвай!
Гатфар – свас я кІвалахар гвай!
Гатфар – кал я булахар гвай!
Гатфар – вирт я мумлахар квай! 

Гад – гада я гьерекат квай!
Гад – къайда я берекат квай!
Гад – са вахт я мярекат гвай!
Гад – са бахт я лап къуват квай!

Зул – са вахт я къизил-гимиш!
Зул – са вахт я майва – емиш!
Зул – са вахт я марфар дуьзмиш!
Зул – са вахт я цифер къизмиш!

ХъуьтІуьн вахт я – живерин тахт!
ХъуьтІуьн вахт я – северин бахт!
ХъуьтІуьн вахт я – ял ядай вахт!
ХъуьтІуьн вахт я – живерин бахт!

Сажидин Саидгасанов

   — Зун вахъ галаз багъ хуьз твах, чан халу, твах ман! — лугьуз, алат тийиз хьана.

   — Вакай за вучда? Вавай багъ хуьз жедач, вун ахварал фида, — лагьана халуди.

   Амма Семед алатнач.

  — Вуна зун твах, зун ксудач, — лагьана Семеда. Эхирни Байрам халу рази хьана.

  — Де хъсан я, къе нянихъ ша. Акван вакай гьихьтин къаравул жедатIа! — лагьана ада.

   Багъ секин тир, гьич ван-сес авачир. Байрам халуни Семед са кьадар вахтунда ихтилатар ийиз ацукьна. Ахпа халу чардахдик акьахна. Са ван-сес акъатайтIа, вичиз хабар це, лагьана ада.

   Семед, вич йифди ксун тавуна гьикI акъвазнатIа, вичи халудихъ галаз багъда къаравулвал гьикI авунатIа, пака аялриз ахъайда лугьуз, фикирар ийиз ацукьна.

   Варз экъечIна. Семед, далудихъди къаткана, вацраз килигиз хьана. Са гзаф килигна вацраз, эхир адаз акваз-акваз вацракай элкъвена кIукI атIанвай къарпуз хьана.

   Ажеб хъсан къарпуз тушни! Яру-яру цIай хьтинди я.

   Семедаз ам къачуз кIан хьана, ада гъил яргъи авуна, амма сакIани гъил агакьнач.

   Садлагьана сада адан къуьне эцяна, гуьгъуьнал алаз япарихъ халудин ван галукьна:

  — Пагь, ажеб хъсан къаравулвал ийизвачни вуна!

   Семед къудгъунна къарагъна, ада вилер тIушунна.

   КилигайтIа, вилик халу акъвазнава, цава варз амач: рагъ экъечIнава. Халу хъуьрена. Семедаз тIимил регъуь хьана.

Гатун марф! Гатун марф!

Дуьз яни зун гатун, марф?

Аквазвачни далуда

Тек са перем авайди,

Гичиндавай цуьк хьтин

Рушни къуьнел алайди?

***

Гатун марф! Гатун марф!

Дуьз яни чун гатун, марф?

Гьикьван вуна гатайтIани,

Зи Анжелка киснава,

Белки ада, белки ада

Вун дуст тирди гьисснава.

Ири-ири стIалар

Физва рушан хъуькъверилай,

Ни лугьуда, гуьрчег туш

Зи руш вири цуькверилай?

А. Саидов

Гатун югъ, гатун югъ!

Хуш я чаз вун атун, югъ.

КIвалах жеда никIера,

Дамах жеда рикIера.

Гатун югъ, гату югъ!

Хуш я чаз вун атун, югъ.

Рехъ гумир на марфариз!

Векьер фирай маркариз…

ХъуьтIуьз малар тух хьурай,

 Некни чIем артух хьурай!

Гатун югъ, гатун югъ!

Хуш я чаз вун атун, югъ.

Гад гьарай я, гад гьарай.

Аялар, куьн фад къарагъ!

Чунни фин, гад ахгудин.

Жезмай кьван фад ахгудин!

А. МутIалибов

Гатфарин лап эхирдай

Дегишвилер мад жеда.

Чими хьана, июндин

Къанни кьведаз гад жеда.

***

ТIимил хъжеда вацIар,

Кьураз эгечIда къацар.

Худда гьатда дергесар,

Кьуд патахъ галтад жеда.

***

Йикъан гьавади къизмиш

Гьар затI ийида битмиш.

Агакьна гатун емиш,

Вири халкьар шад жеда.

***

Шак авач, гатун йикъа

Жеда рагъ чилиз мукьва.

Гьар са вахтуниз икIа

Кьилди вичин дад жеда.

Х. Тагьир

Гатун юкъуз виридан

РикIериз шадвал гъайи

Кьуна тIебиат бирдан

Ири стIалри къвайи…

***

Рагъ хкечIна циферин

Хъуьрез-хъуьрез кьулухъай,

Ван акъатна нуькIерин

Чуьлда гьар са валакай

***

Михьи хьана гьар са пад —

Марфади чил чуьхвена.

И кардикай хьайи шад

Эл кIвалахдал хъфена…

Забит Ризванов