Зи кьил ястухдалла, вилерни рекье,
Вун паталди зи чан кузва, эй ватан,
Гъурбатда гьижрандин¹ хер хьанва рикIе,
Зи вилерай иви физва, эй ватан.

Ватан авачирди амансуз жеда,
Хажалат чIугуна, имансуз² жеда,
Жерягь жагьин тийиз, дармансуз жеда.
Зи дердинин дарман вун я, эй ватан.

Мазали Алидиз кIанда шадвал, хъвер,
Намерддин, хаиндин акъатрай вилер.
Ажалди ина зи туьд кьуртIа эгер,
Зи рикIин эрзиман³ вун я, эй ватан.

Мазали Али

1. Гьижран — дерт, хажалат.
2. Иман — инанмишвал; дин
3. Эрзиман — рикIин эвелимжи мурад

Чун Ватандин аялар я,

Гележегдин хиялар я.

Гьарма сад са мурад я чун,

Чи уьмуьрдал лап шад я чун.

***

Лап хъсандиз кIелда чна

ВикIегь ксар хьун паталди.

Чи дидейрин, бубайринни

Баркаллу тIвар хуьн паталди.

***

ЧIехибурун вилин эквер,

Туьхуьн тийир нурар я чун.

Бахтавардиз чIехи жезвай

Чи Ватандиз лувар я чун.

А. Мегьман

 Шиир хуралай чира!