Йисар физва уьмуьрдин,
ВацIай яд хьиз, хабарсуз.
Эй, бахтавар жегьилвал,
Тазва на зун куз-хъукъуз.

Акурла махпур хьтин
Шалбуз дагъдин тепеяр,
Яргъаз фида, гана лув,
Зи хиялрин лепеяр. 

И дагъларин къужахда
ГъвечIи са хуьр ава, дуст.
Аскан кIвалин цлахъни
Седеф чуьнгуьр гала, дуст.

Садни ана кьил рехи
Дидеди рехъ хуьзва зи.
Им себеб яз, эй дустар,
Хиял кIвализ физва зи.

Диде, валай мегьрибан,
Къени инсан жедани?!
Лагь кван, дустар, дидедлай
КIани инсан жедани?!

Забит Ризванов

Са гьафте я, туш им гъибет
Авачиз зун шалвардин мет.
Йифди-югъди къачуз зегьмет,
Чан гуда за гьикьван, диде? 

За гьикьван къачуда кашар,
Инсандивай эхиз тежар?
Чпи неда ягълу ашар,
Заз фуни гуч яван, диде!

Амай крар эхдай вири –
Динж туш йифиз къаткур ери,
касни авач валай гъейри
Къведайди гьич зи ван, диде!

Хуьруьг Тагьир

Источник

Вач тарсариз, кхьиз тур тIвар,

Ма, къачу ваз ктаб, дафтар,

Гьар са юкъуз чира тарсар,

Виридилай хъсан бала.

***

Ингъе къачу чернил, къелем,

Жуван метлеб ая бегьем.

Нурлу рекье акъваз мягькем,

Вакай хьурай инсан бала.

***

Мектеб я ви чIехи макан,

Илим къачуз эцига чан.

Чешнечи яз, це имтагьан

Эхирда гьар йисан, бала.

А. МутIалибов

Чи надинжвал атIудай.

Диде, чун ви кIуфалай

Алахьнавай хъуьруьн тир,

Булахдилай алахьай

СтIалар хьиз гимишдин,

ЧIалаз муьтIуьгъ тахьайла,

Чинал алай луькIуьн тир.

КIватI жедай чун са кIвализ,

Цилер хьиз са емишдин.

Диде, чун ви гафар тир,

Безекар тир ви рикIин

Диде, вуна гана чаз

Гьардаз хас тир тIвар вичин

Парчадал цуьк, бафтадал

Эцигдайвал зар вичин

Чи цаварин бушлухра

Къушар ава гьар жуьре,

КIвалерани ава чи

Гьар жуьредин затIарни.

Виридалайни багьадиз

Хуьда, диде, ви тIварин.

На гана чаз несигьат,

Чи къилихар дегишна,

Гьуьрмет ийиз чIехидаз,

Гьам жувалай гъвечIидаз.

ТIебиатдихъ галазни

Диде, на чун вердишна.

«Сагьибар хьуь, балаяр,

Берекатлу суфрадин.

Зегьмет чIугваз чир ая,

ТIвар вине хуьх бубадин,

Назбаличар жез тахьуй,

Ксуз тахьуй нисинал,» —

— Лугьудай на, диде чаз

Виридаз са сесинал.

Алван Шагьэмирова

Гьардаз вичин чка ава

Дагълар гьуьлуьв агуд жени?

Заз сифте чIал чирай, диде

Вун рикIелай алуд жени?

***

Къе алемдиз хьурай аян

Вун за рикI я, вун я зи чан.

Вуна лагьай лай-ландин ван

Лагь, рикIивай галуд жени?

***

Гур ялавра кайитIани,

Женгера зун кьейитIани,

Дуьнья са пад хьайитIани,

Вун зи гъиляй къакъуд жени?

***

КьепIин кIане фена йифер,

Хьана лацу жив хьиз кифер.

Эй балаяр, дидед кефер

Хана, рикIяй акъуд жени?

Мейведдин Жабраилов

Зи дидеди кварце аваз

Булахдилай яд гъида.

Зани зверна фена, гъил кьаз,

Жуван диде шад ийида.

***

Ширинди я булахдин яд —

Жемина цуз, хъухъ жуваз.

КIантIа хьурай зегьем тир гад,

Яд акъвазда къай чIугваз.

***

За, дидедиз куьмекар гуз,

Верчериз твар вегьеда;

Кьурукайни пичина куз

ЦIам-кIарас гваз хкведа.

***

Ахъайда нянихъ ада

Яргъи-яргъи хкетар.

Са келима ахъайдач за,

Заз хуш я и суьгьбетар.

***

Зун гъавурда гьат тавур гаф

Жузада за дидедивай.

Заз зи диде кIанда гзаф.

КIанда вилин нинидилай.

И . Гьуьсейнов