•  Жуван ктабдал чар акьалжа.

• Фу недайла, кIелмир! Ам кьацIуда. 

• Ктабдин арада къелем твамир.

• Ктабдин чарар кьвечIилармир.

• Ктабдал кхьинар ийимир.

• Ктабдин аявал ая, ам ви виридайлайни хъсан дуст я.

Шагь дагъдилай кьил къачуна

Авахьзава КцIарин вацI .

Гьар са патхъ хел чукIурна

Хийир гузвай КцIарин вацI.   

***

Дамахда на жуван целди,

Гатфарилай лап живедалди,

ЧIакIардилай Чпирдалди

Кис тежедай КцIарин вацI.

М. Межмуллаев

Камил кIвале къугъвазвай. Адавай хатадай бади хана. КIвале касни авачир. Гада гзаф фикирлу хьана, и арада кIвализ буба хтана.

— Бади ни хана? — хабар кьуна ада.

    Камила, кичIез-кичIез вичивай хана, лагьана.

— Баркалла, — лагьана бубади. — Дуьз лугьун хъсан кар я. Таб авун пис кар я.

Закиев И.Н., Курбанова Ф.Т. «Лезги чIал»
2-синиф, Баку, 2006,-112с

      Куьчедай са гадани са руш физвай. Абурун вилик кваз са къарини физвай. Чил гзаф пис цIуьдгъуьндайвал авай. Къаридин кIвач цIуьдгъуьнна, ам алукьна.

— Ма, зи ктабар яхъ! – лагьана гьарайна гадади, вичин сумка рушав вугана, къаридиз куьмек гуз эверна.  Ам хтайла, адавай руша хабар кьуна:

— Ам ви чIехи диде яни?

— Ваъ, — жаваб гана гадади.

— Диде яни?- лагьана жузуна мад руша, мягьтел хьана.

— Туш!

— Хала яни? ТахьайтIа ваз чидайди яни?

— Туш, эхир, туш! – жаваб гана адаз гадади. – Ам таниш тушир са къари я!

В. Осеева

Суалар:

1. Гадади къаридиз гьикI куьмек гана?
2. Куьнени куьзуьбуруз куьмек гадани?

Мамадин руш

  Фаридадин пуд йис я. Адаз гъвечIи аялрихъ галаз къугъваз гзаф кIанда. Садра ам кIвализ гьа вич хьтин иер са руш галаз хтана. Дидеди адавай жузуна:

— Фарида чан, вахъ галаз хтанвай и руш нинди я?

— Вичин дидедин,- жаваб гана Фаридади уьткемдиз.

— АкI ваъ, чан руш, за задан диде чириз кIанзава, адан диде вуж я?

— Адан диде мама я. ГьакI тушни, Мария?- лагьана Фаридади

Р. Шарифова

Тапшуругъ: КIела. Суалриз жаваб кхьихь:

1. Фаридадин шумуд йис я?

2. Фарида гьихьтин руш я?

2. Фаридади дидедиз вуч лагьана?

Некни фу

Квар, квар,
гъерини фу ваз хьурай!
Квар, квар,
нисини фу заз хьурай!

Квар, квар,

къатухни фу Элшадаз хьурай!
Квар, квар,
айранни фу Гуьлшандиз хьурай!

Квар, квар,

гьида кIвалах тавуртIа,

вичин тарсар
чириз алахъ тавуртIа,
гьадаз хьурай цIвегьни фу,
гьида вадар къачуртIа,
гъадаз хьурай некни фу!

Тапшуругь :   КIела, ахпа михьидаказ кхьихь! Шиир хуралай чира!