Шиир “Квез Рамазан варз мубарак!” Стих о Рамадане на лезгинском языке

Сад лагьай къуз Рамазандин,
КIан жедайвал чун Аллагьдиз,
Башламиша сифте сив хуьз,
Квез Рамазан варз мубарак!

Карвансара дуьнья я им,
Эхиратда рахадай сим,
Зи лезги халкь, сивер хуьх чим,
Квез Рамазан варз мубарак!

Фугъарадиз ая куьмек,
Аквадайвал Женнетда экв,
Сурун суал тахьуй гьелек,
Квез Рамазан варз мубарак!

Пайгъамбардиз  акур ахвар,
Сивер хуьник я кIвалахар,
Тахьурай чи вилел накъвар,
Квез Рамазан варз мубарак!

Сивер хуьниз ава къуват,
Сагъвал хуьниз еке такьат,
Ислам диндин багьа савкьат,
Квез Рамазан варз мубарак!

Ишелни-хвал, вад метр хун,
Валлагь, фида дуьньядай чун,
Ша сивер хуьн кьиле тухун,
Квез Рамазан варз мубарак!

Адам, Гьава – диде-буба,
ЧIуру кIвалах ая туба,
Пайгъамбардин  я чун арха,
Квез Рамазан варз мубарак!

Сивер хуьнихъ ава метлеб,
Куьруь жедай гунагьрин еб,
Аллагьдивай хьуй квез себеб,
Квез Рамазан варз мубарак!

СиратIал муьгъ язва кьакьан,
Сив хвейидаз жеда аскIан,
Куь гунагьар квахьда накьан,
Квез Рамазан варз мубарак!

ЧIехи Аллагь мецел алаз,
Сиверни ферз рикIе аваз,
Исламдивай тежез яргъаз,
Квез Рамазан варз мубарак!

Я Къурбанд хьай варз Рамазан,
Вуч ширин я азандин ван,
Лезги халкьдиз хьурай вун кIан,
Квез Рамазан варз мубарак!

Сираждинан хуьр я Кукваз,
ПIирер, шейхер кIанда акваз,
Аллагьдивай жемир яргъаз,
Квез Рамазан варз мубарак!

Сиражудин РАСУЛОВ
Кьурагь райондин Куквазрин хуьр

Оставить комментарий