Шиир “Чан ширин азиз Рамазан!” Стих о Рамадане на лезгинском языке

Низ аватIа гунагь пара,
Гьадаз жеда вакай чара,
Уьмметарин дердин дава,
Чан ширин азиз Рамазан.

Бахтлубур я сив хвейибур,
Нефсиниз тербет гайибур,
Йифиз пара капI авурбур,
Чан ширин азиз Рамазан.

Йис атайла къведай къунагъ,
Чи рикIериз нур гудай рагъ,
Дин-майвадин Исламдин багъ,
Чан ширин азиз Рамазан.

Марифатдин рекьер чирдай,
Гзаф дерин сирер чирдай,
Шариатдиз бегьер гудай,
Чан ширин азиз Рамазан.

Заз кьван шадвал кIан яни ваз?
Мубарак хьуй вун атун чаз,
Салат-Салам Мугьаммадаз,
Чан ширин азиз Рамазан.

МичIи суруз экв гудай нур,
Шукур Аллагь вун чаз акур,
Къадридин йиф кьисмет авур,
Чан ширин азиз Рамазан.

Сив хуьн сувар мубарак хьуй!
Мугьаммадаз Салават хьуй,
Къуръандин нур чаз кьисмет хьуй,
Чан ширин азиз Рамазан.

Залан нефсер кьезилардай,
Таравигьар ширинардай,
КIелиз Кьуръан текбирардай,
Чан ширин азиз Рамазан.

Аллагьди чаз гайи нямет,
Ислам диндин чIехи девлет,
Ваз ийида чна минет,
Чан ширин азиз Рамазан.

Сиве жеда рейгьандин ни,
Уьмметарин сирдин наби,
Вун атайла, жеда хвеши,
Чан ширин азиз Рамазан.

Аскер ИБРАГЬИМОВ
Кьурагь райондин
КьепIиррин хуьр

Оставить комментарий